Jude

Jude Jude Malele Epapua Auga

1 Lau Jude Iesu Kristo ega pinauga au, ke James akina au i'ina malelega lapapua oi i'a Ama'a Deo eifanimi, animi eani alogaina papiaumi aumi, ke Iesu Kristo faugai Deo oi i'ina agofa'a lao'i mai'i ee'iai epakaisapuimi aumi eemiai laulaisa.

2 Lau lamegamega ega koa Deo ega guani, ega gagao, ke Isa alo ko'agai papiau ani'i eani auga laoga maina fou alomi fepapogua, fepafakaua laoma.

Jude Papiau Deo Aina Kainai Akepea Au'i Aina'i Epalogo

3 Ekefa'auagai, lau alou ipaumagai anina laani Iesu Kristo i'a kania'a eagamauga auga fouga i'a fou kai'alao apako'ania auga fouga fapapua eemi fefai laoma. Ega'ina alogai kapa aga'o felo laisa auga, lau maleleai fapapua oi eemi fefai magogomi faauga, ega koa Deo pako'a ega papiau epeni aga'oni'i mo auga pipainina fopa'aua laoma. 4 Gome au isa'i ufainagai Deo ega iifa pukagai fou'i kepapua, Deo isa afa apala agepeni'i keoma au'i, pau ogefakeai kefai oi epomiai kekoko. Isa auga Deo aina kainai akepea, ke i'a a'a Deo ega gafegafe keafi aipopo, ega'ina gafegafegai amage koa lao'i mai'i apala'i kekapa'i, ke i'a a'a Lopia aga'omo Isapu Akaiki'a Gome Auga, Iesu Kristo kepuniaiaina.

5 Kai papiau Deo aina laagai keaopagai au'i Deo isa afa apala epenii'i auga oi ma'oai ologo efua. Ega mo ganinagai, lau oi mapaopolanimi pugu laoma. Ufainagai Lopia ^{▼▼5 Papiau isa'i ‘Iesu’ kepapua.} ega papiau Isipto agogai epapealai'i kai muniai aisama, kaisau isa akepako'ania au'i eauoka'i. 6 Ke Deo agelo afu'i epenii'i e'i isapuai afu ega'ina ke'imaisa auga afuga kepua'afuga au'i, eafii'i tieini afaemoumou auga tieininai egopei'i uminagai epaagu'i keague. Ke isa egae keague paisa Iesu agemai pugu, papiau e'i laomai felo, o apala afa agepeni'i auga kina akaiki'a ke'ima. 7 Ke ega koa i'opoga, Sodom, Komora taoni'i papiau'i, ke taoni isa keka lofe'i au'i papiau'i fou ifo'i imaau'i kelogoaina, aufalao aga'o fou akeamage auga fou kefeu, ke au au fou, ke papie papie fou ifo'i mo amage koa lao'i mai'i kekapai'i au'i, Deo lo eulaisa e'i taoni ke papiau isafa keaga. Ega'ina emia auga muni Deo lo aealoalo auga logai papiau e'i laomai apala afa agepeni'i, ke isa ega'ina logai akekiekie aoniamo auga i'a epakinai'a.

8 Ke Deo isa e'i laomai apala afa epenii'i koa i'opoga mo, pau au isa'i isa koa i'opo'i au'i kefai oi epomiai kekoko, keagu opola apala'i kenipi'i, ke ifo'i imaau'i kepalifu'i, ke isapu keafia au'i papa'iai fekeagu fekepinauga auga keumakalaina, ke agelo isafa ee'iai keifa apala. 9 Kai Deo ega lopia agelo Michael, tiapolo auni'i Moses emae auga imaauga puogai keakekua aisama, isa tiapolo mo ganinagai, Michael isa aeifa apala penia Deo isa afa apala fepenia aeoma kai, epainia eifa, “Lopia efinaiso!” mo eoma. 10 Kai ega mo ganinagai, i'ina au'i auga kapa'ina oko'i akelogo au'i ee'iai keifa apala. Ke kapa'ina oko'i kelogo auga akeopola felo kai, uma amu'e mino'i laa'i koa i'opo'i e'i laomaisai kekagakaga. Isa ega'ina kapa'i kekapa'i au'i isa ifo'i mo kepalifu'i.

11 Deo isa afa apala ipauma fepeni'i laoma! Gome isa ufainagai Kaino keaga eafiia auga keagaga keafia. Ke ufainagai Balaam moni mo puogai egagapai koa i'opoga, isa isafa kegagapai moni mo kegaafia keoma muninai kepiau. Ke isa ufainagai Kora Deo ega iifa eumakalaina koa i'opoga mo kekapaisa puo, Deo Kora eauoka koa i'opoga, isa isafa eauoka'i efua.

12 Ke oi alomi ko'agai animi oani auga laoga maina okapa ola'afou oaniani aisama, i'ina au'i isafa kefai oi fou ola'afou oaniani. Kai isa kefai keaniani aisama, aimani'i'i mo kefai oi epomiai ke ifo'i mo keopolani'i puo, oi emi la'afou ega'ina kepalifua. Ke isa auga apuapu amekuai emai kai imuga laa'i koa i'opo'i. Ke isa au'i au pua'i i'afe'i kina ekaina kai, pua'i aga'o aeoge koa i'opoga, ke gome'iai kefuau'i kemae efua au'i koa i'opo'i. Ega kainai isa au'i mae auni'i kepamia koa i'opoga. 13 Ke isa e'i meagai auga, a'u emoge goiso fukofuko ofuga emai foeai e'afoaua aisa auga koa i'opoga. Ke isa au'i mi'imi'i ufa guagai kelao kemai aage mo au'i koa i'opo'i, ke Deo isa afu'i umina ipauma ageka aoniamo auga afuga epafua ekae.

14 Ke ufainagai Adamo faagagai mauni ninina imagea gua emia alogai, au aka Enok eagu. Ke isa auga profeta koa emia ega'ina au'i fou'i iina eifa oma: “Maami galao Lopia, ke ega agelo alo'i elolofa au'i, au'i ealogai alogaina fou kemai amoisa'i. Ke isa kemai auga, papiau ma'oai e'i laomai felo o apala afa fepeni'i puogai emai. Ke papiau e'i laomai apala'i kainai, laomai apala'i kekapai'i au'i afa akeafia auga fouga maa'iai ageifafoua. Ke papiau e'i nini'aniai iifa apala'i Lopia eegai keifani'i au'i fou afa'i agepeni'i,” eoma. 16 I'ina au'i iifa mugumugu au'i, ke aufa kina papiau e'i apala mo kekapuga keifani'i, ke ifo'i alo'iai apala keopolaga auga mo muninai kepea. Ke isa ifo'i mo olaga'i ke'anina. Ke isa auga isa ifo'i mo fau'iai kapa aga'o kegaafia keoma puo, pifogeai nini'ani felogai koa i'opogai papiau maa'iai kenini'ani.

Magogo Kapula Ke Alomi Ko'agai Deo Ke Papiau Fou Ani'i Foani Auga Aguga

17 Kai ekefa'auagai, i'a a'a Lopia Iesu Kristo ega apostolo kapa'ina akemia fou'i keifa kakau'i au'i foopolani'i. 18 Isa oi kepainimi keinaka, “Kina fua'iai aisama, papiau akeifa palago, ke ifo'i alo'iai kapa'ina ani'i keani au'i mo muni'iai akepea,” keoma. 19 I'ina au'i oi epomiai kekoko keaupeaimi, opomi i'oina i'oina emia. Ke isa auga isa ifo'i mo alo'iai aagoa kapa'i ani'i keani au'i mo muni'iai kepea, ke Deo ega Spiritu isa alo'iai aeagu.

20 Kai ekefa'auagai, oi emi pako'a kapa akaiki'a ipauma Deo anina eani koa i'opoga, alomi ko'agai ega'ina pako'aga foafiapia, ke ega'ina pako'agai fouki, ke emi megamegai Deo ega Spiritu kapa'ina epalogonimi auga mo megamega fopa'aua. 21 Ke oi Lopia Iesu Kristo ega guaniai agu pagai maunina agepenimi auga alomi ko'agai kaina okai alogai, Deo alo ko'agai papiau ani'i eani auga laoga mainai foagu. 22 Ke kaisau Deo eegai opo'i gua emia au'i foisa'i gua'i foania. 23 Ke kaisau laomai apala'i kekapa'i, lo aealoalo loga alogai akeaga au'i fola'alai'i kania'i foagamauga. Ke papiau isa'i auga foisa'i gua'i foania kai, ee'iai afa fomani'i. Ke papiau ifo'i imaau'i alo kegapagama keoma, laomai apala'i kekapa'i au'i e'i tiapu mo ganinagai kepaofua. Oi alomi ko'agai isa e'i tiapu mo ganinagai, anina foloani.

Deo Isau Afagaina Fouga

24 Ke pau Deo oi fepakaisapuimi folo'ualai fekaina auga, ke ega isapu eaea akaiki'a fou alogai agoapa aisama, alomiai laomai apala aga'o faeisa. Ke alogamai Isa agogai agoapa auga, ke Deo ifogamo i'a kania'a eagamauga Auga, i'a a'a Lopia Iesu Kristo faagagai Isa amaau afagaina, au akaiki'a amapamia, isapu gome auga amapamia. Ke Isa ega isapuai kapa ma'oai e'ima'i auga amapamia. Ke kapa ma'oai akegama koa kai, Deo eagu auga, pau eague auga, ke ageagu aoniamo auga amaau afagaina aoniamo! Amen.